Тропарь, глас 2:
От ю́ности твоея́ Бо́га всем се́рдцем возлюби́ла еси́, Харити́но преподо́бная, подви́ги в ве́ре положи́ла еси́ за Христа́ Жениха́ твоего́, и в но́вое твое́ Оте́чество, зе́млю Ру́сскую всели́лася еси́, к Небе́сному Оте́честву нас прнзыва́еши, моля́щи Христа́ Бо́га спасти́ся душа́м на́шим.
Кондак, глас 4:
Оте́чество твое́ и род оста́вивши, Вели́каго Новагра́да дости́гла еси́, во оби́тели и́ночестей многотру́дный по́двиг преподо́бнический подъя́ла еси́, а́нгельски на земле́ пожи́вши, мно́гим жена́м ру́сским путь ко спасе́нию показа́в. Те́мже вси притека́юще к тебе́ зове́м: ра́дуйся, преподо́бная ма́ти на́ша Харити́но.
Величание
Ублажа́ем тя, преподо́бная ма́ти Харити́но, и чтим святу́ю па́мять твою́, наста́внице и́нокиням и собесе́днице а́нгелом.
МОЛИТВА
О преподо́бная и пресла́вная ма́ти Харити́но, неве́сто Жениха́ твоего́ Христа́, предста́тельнице и храни́тельнице Вели́каго Новагра́да и земли́ Ру́сския. Услы́ши ны, моля́щияся к тебе́, и я́коже попече́ние име́ла еси́ о оби́тели твое́й и и́ночествующих в ней, и мно́жество жен ру́сских на путь спасе́ния напра́вила еси́, та́ко и ны́не помози́ нам, просвети́ омраче́ние умо́в на́ших и к све́ту и́стинныя ве́ры наста́ви наро́д росси́йский, наде́жду на Бо́га в душа́х на́ших укрепи́, любо́вь в сердца́х на́ших утверди́ и испроси́ нам вре́мя на покая́ние.
Во дни вели́ких бед и скорбе́й страны́ на́шея бу́ди о нас засту́пница, умоли́ Пречи́стую Ма́терь Го́спода, да спасе́т зе́млю Ру́сскую от гла́да, от наше́ствия враго́в и междоусо́бныя бра́ни, от смертоно́сных язв и боле́зней, да укрепи́т ны в правосла́вии, единомы́слии, братолю́бии и непоколеби́мом да́же до сме́рти испове́дании ве́ры Христо́вы, да научи́т ны послуша́нию Це́ркви Его́ святе́й.
О приснопа́мятная ма́ти на́ша Харити́но, принеси́ за нас гре́шных моли́твы твоя́ и разсе́янных чад Бо́жиих собери́ любо́вию твое́ю, да возгори́тся пла́мень моли́твы в сердца́х на́ших, да сла́вяще па́мять твою́, просла́вим Го́спода на́шего Иису́са Христа́ во ве́ки веко́в. Ами́нь.